“Cjalait che, ancje se al è un predi, al à reson”.

Sergio De Infanti al riclamave dispès, cun cheste frase ruspie, i amîs de mont a rivuart di pre Mario Qualizza. De Infanti, dissacradôr par ecelence, fi autentic de Cjargne di mont, al jere alpinist, cussì come che al jere alpinist e fi autentic dai boscs grivis des prealps di confin pre Qualizza. Cumò a son di gnûf insiemi intun “mont di là”; par di ca ju vin ancjemò te nestre memorie. Magari cussì no, lis memoriis si indebilissin e si sfantin cun nô: mantignìnlis, fin cuant che o sin.

Pôc timp indaûr mi soi cjatade a fevelâ cuntun amì sul significât che a àn vuê i cimitieris, su la oportunitât di targhis al puest di colomberis o tombis, acetant parfin chês targhis metudis là che e scomence cualchi rimpinade par ricuardâ cui che nol jere tornât jù vîf; targhis che a son stadis gjavadis cuant che, cul passâ dai agns, l’alpinisim eroic al à lassât spazi a chel ludic, che al va ben, ancje se al è miôr no dismenteâsi dai aspiets reâi de storie.

L’amì al preferive lis tombis di lâ a cjatâ, jo targhis e cinisis di sparniçâ, ancje se o ai di dî che ancje jo o ai visitât cimitieris su lis Alps e in Patagonie, cun partecipazion emotive e no dome par curiositât.

Saludantsi, i ai dite, cussì, cence pensâi masse parsore, che o sarès istès lade ancjemò a visitâ cualchi tombe: “une che o larès a cirî e je chê di pre Mario Qualizza, mancjât di pôc”.

Parcè po? Parcè che mi stave simpatic par chel che o savevi di lui? Parcè che lu leavi a Sergio De Infanti che o vevi cognossût e preseât, e la lôr amicizie reciproche mi puartave a crodi che ancje jo o varès vût cualchi afinitât cun lui? No lu sai. Il fat al è che mi cjati a Sant Pieri al Nadison, confrontade jenfri di mê cun chê declarazion, e pes cumbinazions dal câs. La ocasion concrete e rive di un apontament dât intune des innomenadis scaletariis. Biel che o spieti o ai timp, propit a Sant Pieri al è stât plevan intai siei ultins agns pre Qualizza – e no vevio dite che o sarès lade a cirî la sô tombe?

A Sant Pieri lis scaletariis che si contindin la innomine a son dôs e une dongje di chê altre, ancje i cimitieris a son doi e cun di plui un dongje di chel altri, ma o fâs plui dificoltât te ricercje in cimitieri che in scaletarie.

O ziri leìnt datis e nons su lis lapidis, cence cjatâ chê che o cîr.

Une siore anziane e viôt la mê espression pierdude e e decît di judâmi. No, no à cognossût pre Qualizza, ma e prove a domandâ al plevan, lu clame cul celulâr. Ma il plevan nol rispuint, e il lûc de ultime polse di pre Qualizza al reste un misteri.

Dongje des dôs scaletariis, però, o cjati cualchidun che mi da un sugjeriment: “Che e vadi a cirî tal comun di Sant Lenart”. “La biele glesie che si viôt lant sù a Madone di Mont?” “No, une piçule frazion, Cravar, che e stedi atente, la beorcje si viôt pôc, e partìs une stradute ripide e strete”. La prospetive di une piçule ricognizion mi plâs e mi rint curiose. Daspò de imbocjadure la strade no je plui ni ripide ni strete e daspò cualchi chilometri o rivi tal abitât di Cravar. Il cimitieri? O scuen cirîlu, no viôt nissun par strade, ni un negozi ni un bar che, in efiets, no son. O percepìs che chel lûc al puedi vê une sô anime particolâr ancje intal sô jessi cuasi abandonât. O soi atrate di une gleseute maraveose, che o scuvierç jessi une des glesiis votivis plui bielis dal Friûl, ma il cimitieri al è dut di une altre bande.

Cuissà parcè che pre Qualizza al à volût restâ propit achì? Mi domandi vierzint il puarton pesant di un piçul cimitieri in fonts di un viâl di tiere batude, sierât jenfri i mûrs, cenglât di arbui, che no si vierç su spazis di viodude vierte cemût che o crodevi che al varès vût di jessi il desideri ultin di un alpinist. Ve la tombe: e je la ultime in ordin di timp, ancjemò provisorie, cence flôrs, cualchidun le cure. Mi fermi a pensâ. Se pre Qualizza al cirive la serenitât inte umiltât di un lûc platât, achì le à cjatade, ma forsit a son ancje altris motîfs, anime e memorie a saran po ancje di altris bandis e magari su cualchi cime des Andis; che chi al polsi in pâs, al ven spontani il vôt. O torni al slarc, là che une biele fontane lu fâs someâ a une plaçute. O tocj il rubinet: la aghe e rive. O imagjini che si puedi bevi, ma o domandi conferme a un siôr anzian che al è daur a taiâ un toc di prât dilunc la strade. Cuant che al ferme il machinari e al si gjave il casc, al mostre un riduç sutîl cun dolce amabilitât: “Sigûr, si pues bevi e e je ancje buine”. Cuasi par domandâ scuse dal disturp, o dîs parcè che o soi rivade in chel lûc che no cognòs e che al somee pierdût, e il riduç si vierç maraveôs inte sô semplicitât: “Pre Mario al jere gno fradi”.

O lassi a cui che al lei il fantasiâ in mût plui o mancul razionâl su incuintris di cheste fate, o segns dal destin, che a ogni mût a son regâi de vite. O zonti, dut câs, alc di ce che al è vignût daspò dal incuintri. In fonts, e je ancje la spiegazion che e je stade regalade aes domandis che o vevi vignint fûr dal cimitieri.

Giuseppe Qualizza, dit Beppe, un dai dîs fîs de famee che e jere a stâ a Cravar di gjenerazions, al è machinist ferovîr in pension.

Pe mê curiositât al spieghe cun calme cemût che e jere la lôr vite une volte e cemût che al è cressût achì chel che nol sarès stât dome pre Mario, ma ancje bonsignôr inte cariere eclesiastiche e insegnant in seminari, pûr mantignint la olme autentiche des sôs origjins, là che al nas ancje il so rapuart naturâl cul alpinisim.

Vuê i parincj restâts a vivin di altris bandis, dut câs a mantegnin rapuarts cun Cravar, e se pûr ancje lui al è lât a stâ in planure, al torne dispès a frecuentâ il paîs e, o disarès, a curâ la culture de sô comunitât, inte pratiche e inte memorie.

Cul meti a puest la vecje cjase di famee al à recuperât ce che al meretave di jessi salvât tant che testemoneance: mi compagne ae “Mostre di ogjets di ûs cuotidian”, inmaneade di lui inte vecje scuele, aromai sierade parcè che i fruts dai plui o mancul cincuante abitants restâts a son masse pôcs par tignîle vierte. Inte sô mostre, Beppe Qualizza al à esponût cun ordin e competence i ogjets cjapâts di cjase Qualizza, cualchidun precedent la vite de none nassude tal 1905. Al à fat un inventari, schedis precisis cun indicazions bilengâls par talian e sloven, e al marche la impuartance te vite di ogni dì di altris gjenerazions.

A son ancje il russac e la piche di pre Mario. Tal insiemi, mi trasmet cun cortesie inmagante la sô esperience di storie vivude. La vite rurâl e jere di auto sussistence: coltivazion (cu la culture dai orts che vuê e resist in part cuntun disvilup moderni eficient), cure dai boscs (len e ativitât di marangon), arlevament. La sorevivence graciis ai boscs, al conte, e je stade pussibile ancje par un grop di disertôrs, sedi austriacs che talians, de prime vuere mondiâl, che insiemi si jerin platâts alì dongje.

Dal len di cjastinâr, taiât intes lunis di Avost e Fevrâr, si tiravin fûr imprescj e sieraments: la esposizion di splanis, ancje particolârs pai barcons, di seis par bream, di manariis pai trâfs dal tet e je straordenarie.

Vuê il cjastenêt al è pôc coltivât; plantis mancul utilis a àn cjapât il puest dai terens di pascul. Ma Beppe Qualizza mi spieghe tropis robis che ancjemò a tramandin i toponims. Cravar al ven dal sloven Krava e al rivoche i pascui pes vacjis, biel che altris toponims a caraterizin lis zonis sieltis pes culturis e par plantâ lis speciis di arbui daûr de esposizion al soreli o al vint, cun adietîfs tant che “pod” che al significhe “sot”. O buti un voli suntun gjornâl bilengâl: o viôt che al è lui che al cure, almancul in part, la redazion.

O ringracii, mi displâs lassâlu, al è stât dut cussì profont tal sô jessi inspietât, o volarès fermâ chestis oris, tal timp e fûr dal timp.

La lôr risonance e continue a compagnâmi cun gratitudin, par Beppe Qualizza e par chest slargjâsi dal alpinisim tal puartâ significâts dilunc de vite.

Il cimitieri di Cravar nol sarà particolâr ni cetant frecuentât, ma nol è chest l’impuartant: o crôt di vê capît une sielte, e o scuen tornâ a viodi lis mês considerazions su lis tombis.

Cun di plui, a Cravar si viôt la gleseute di Sante Luzie: e je dal 1454, la sô impuartance storiche e artistiche e va ben plui innà di chel clamâti spontani de sô architeture che e infont tenarece.

A mi, alpiniste, mi fevelin ancje lis dôs vecjis cuardis sutilis che a pindulin libaris des cjampanis de bifore: lis cjareci in mût platât, lis imagjini dopradis une volte in rimpinade, magari ancjemò di pre Mario. O soi tentade di tirâlis un pôc, po no olsi. O olsi invezit imagjinâ che lui dut câs mi fasarès une riduçade di comprension intune complicitât di frutins, forsit ancje cumò dulinvie pal mê viaç intune serenitât un pôc meditative, biel che o torni dulà che o jeri partide par cirî di cjatâlu: la scaletarie di Sant Pieri al Nadison.