Mi soi intivât in Antonio Feruglio in ocasion di une cunvigne su Oscar Soravito.

Mi interessave capî cemût che a vevin podût cressi inte Saf alpiniscj come lui, come Celso Gilberti, come Giovanni Granzotto e come tancj altris, fin al “florî di une vere scuele alpinistiche” furlane, partint di une situazion di retrovuardie.

Giovanni Battista Spezzotti, intai “Profîi” scrits pal numar di In Alto dal centenari (1974), al dave il merit soredut a Antonio Feruglio e a Riccardo Spinotti. Dal prin al zontave un ritrat morâl nobil: “Spirt braurôs, ardint e leâl ai ideai di libertât, ancje a presit di paiâ, cemût che al è sucedût, di persone, ju afermà cuant che i timps no permetevin, nancje ai dissidents plui moderâts, autonomie di pinsîr e di azion.” Plui indenant al diseve alc rivuart di une permanence coercitive a Lipari. Su la stesse riviste, in ocasion de muart intal 1984, Soravito al scriveve un so ricuart tal plui sclet “stîl Soravito”: une vore esaustîf, une vore sut e cuasi dal dut limitât ae part alpinistiche.

Si scugnive puartâ a compiment il ritrat, o crôt, zontant la part politiche che si jere davuelte in contemporanie: dutis lis dôs a vevin vût la lôr fase plui venturose intai agns dal 1920 al 1927, finint cul confin a Lipari.

Antonio Feruglio al nas a Felet ai 16 di Otubar dal 1896 di Giobatta “Broili” e di Giustina Tosolini. Famee benestante, proprietarie di tiere, numerose. Ducj i fîs a vegnin fats studiâ almancul fin aes superiôrs: Felice e lis dôs sûrs Maria e Giuseppina a son mestris, Teresa no si sa, Beniamino gjeometre si iscrîf a agrarie a Bologne, ma daspò dai fats di Palaç d’Accursio al passe trê mês in preson e al ven butât fûr de Universitât, Antonio al è resonîr, Domenico laureât in agrarie al è diretôr dal Reâl Laboratori di chimiche agrarie di Udin, e ancje diretôr de orchestre e comediograf, Giuseppe miedi docent inte Universitât di Padue. Felet al è un paîs soredut operari e politicizât (al è cognossût tant che baluart dal socialisim) e i components de famee lu son in maniere particolâr, soredut pe influence de mari.

Par chest a paiaran un presit alt: ducj i fradis masclis a pierdaran il puest di lavôr parcè che contraris al fassisim, la cjase là che a vivevin e vignarà brusade, Beniamino condanât a nûf agns di confin, po dopo a cinc di vigjilance speciâl a San Donà di Piave, là che daspò de liberazion al deventarà sindic. Un cognossint, Arno Foschiatti, muredôr, si vise che “insiemi cun altris zovins o lavin a scoltâ lis discussions cence fin in cjase Feruglio, cirint di capî ce che o podevin, e e jere la mari mestre che dispès e contribuive a slungjâ il dibatiment.

Lôr cusin Egidio Feruglio, conseîr de Societât Alpine Furlane e redatôr di In Alto dal 1920 al 1924 e dal 1949 al 1950, gjeolic libar docent de Universitât di Bologne, pes consecuencis dal so refudâ di iscrivisi al partît fassiste tal 1934 al à di emigrâ in Argjentine.

Ancje i fradis a son cetant passionâts di montagne: Felice e Giuseppe a risultin iscrits ae Saf par agns, Beniamino lu compagne in cualchi salide, Antonio al è iscrit cence interuzions dal 1920 almancul fin al 1970, gjavât dome il 1929.

Daspò dal diplome in resonarie, scartât ae visite di jeve par insuficience toraciche, Antonio al jentre in bancje e al reste al so puest di lavôr ancje daspò de ritirade di Cjaurêt. Al scomence a frecuentâ lis monts tal imprin dai agns ’20. Il fi Fausto si vise che al jere bon di lâ a Scluse in biciclete puartantsi daur i schîs, lassâ il mieç di traspuart, lâ su a Nevee e lâ jù a Tarvis cui schîs, cjapâ il tren, tornâ a cjolisi la biciclete e duncje a cjase, e dut inte stesse dì.

La Alpine furlane che al frecuente e je une Societât cun problemis grues che a rivin de vuere: socis muarts o dispatriâts, biblioteche e sede sociâl fiscadis, ripârs distruts. Lis rimpinadis a son ae fin de liste dai problemis. Nol è che a stessin miôr intai vincj agns prime: inte Cunvigne di Rigulât dal 1901, il gnûf president Olinto Marinelli al lamentave che il periodi eroic de esplorazions des nestris monts al jere passât e che i “alpiniscj di profession”, ven a stâi chei che lis frecuentavin par scuvierzilis, a varessin vût di trasformâsi in esploradôrs sientifics se no vevin voie di disparî.

Inte Cunvigne di Pontebe dal 1906, Marinelli al cambie un pôc cheste impostazion, ma la muart intes monts di Giuseppe De Gasperi intal 1907 e di Vittorio Tessitori tal 1914 e fâs sì che, gjavadis lis salidis di Alessandro Del Torso a Lavarêt intal 1913, pôcs alpiniscj si impegnin in rimpinadis e anzit che e vegni bandonade ancje la esplorazion.

Par fâ un confront, inte Societât Alpine des Juliis, a scomençâ cul 1898 al devente prassi puartâ inte assemblee dai socis un rindicont precîs de ativitât alpinistiche dal an.

Lis salidis di Antonio a son ricuardadis pe prime volte in In Alto tal 1921 cuant che al torne a fâ la vie di Dogne al Montâs, vierte di Giacomo di Brazzà, di Pecile e dai fradis Mantica intal 1882. Spezzotti la conte cussì: “A Feruglio al spiete il merit di vê tornât a scuvierzi la Vie Dogne. Ai 29 di Avost cul fradi Beniamino, cun Luigi Bonanni e Mario Rea, cjapât tant che acompagnadôr un abitant de valade, ciert Guglielmo Pittino, cjapât a vore dome par rindi plui facile la ricercje di un itinerari che lui, vecjo cjaçadôr, al diseve di cognossi, ma che ae fin al veve cuasi dal dut dismenteât, cence cuarde, cun furniment inadeguât, intune zornade grise di fumate, cun ploie intermitente, fidantsi dal so istint e de intuizion de strade pal orientament, al rivà sot sere ae cime dal Jôf. La pocje visibilitât no permeteve di podê dî se la strade che e vevin fate e jere dal dut, o dome in part, la stesse fate in origjin di Brazzà e Mantica.

Par ricognossile dal dut e fo impuartante la salide fate dopo, tal 1922, cence vuide, dal stes Feruglio cun Cesare Scapini, Livia Cesare e Valda Driussi”.

Al va sù ancje sul Serni ai 5 di Jugn, su la Crete di Cjanivate ai 10 di Lui e al fâs un tentatîf su la Mont Blancje ai 29 di Avost, falît par il malstâ di un dai partecipants.

Intal stes an al è un dai fondadôrs de sezion di Udin de Uoei. Par spiegâ parcè che, ancje se iscrit ae Saf, Feruglio al si è impegnât inte fondazion di une associazion in fin dai fats concorinte, si scuen fâ un pas indaûr. O sin tal 1907, cuant che par leç si decît che il dì de polse setemanâl al à di sei la domenie. La zornade libare e puarte tante int a frecuentâ in grop l’ambient de mont, ma “in Italie la iscrizion al Cai e jere risiervade ae classe medie alte”. Intal 1911 a Monze si fonde la prime sezion de Uoei, che si rivolzeve ancje intal non in maniere specifiche ai operaris cul mot “pe montagne e cuintri dal alcul” (intal 1909 si contin plui di 1400 muarts par alcolisim cronic), puartantjur a frecuentâ la mont viodude tant che un ambient sani e biel. Lis cuotis associativis a son une vore bassis (ae fondazion, un franc al an) e simpri plui bassis di chês dal Cai; par fâ l’esempli de Saf, cheste, ancje se si jere stacade dal Cai par motîfs economics, intal 1921 e domandave ai socis che a jerin a stâ a Udin 60 francs al an, ancje se si podeve paiâ in cuatri ratis, 36 ai straordenaris e 24 a chei che no jerin a stâ alì; la Uoei si contentave tal 1924 di 7 pai ordenaris e 12 pai sostignidôrs.

Tornant al parcè de fondazion de sezion Uoei, Aldo Cuttini, plui indenant component dal Pci dal Comitât furlan di Liberazion, al ricuarde: “Cun Antonio o levin parsore Tarcint, su la Mont Musi, propit sore dal Cuarnan. Si sentavin ducj li e lui al pontificave, nus spiegave, o jerin plui o mancul vincj fantats; nol si podeve puartâ cjarte e pene, parcè che al diseve: «Se o volês lâ in preson puartait un notes e une pene e us siguri che in trê mês… scoltait e tignîtlu par voaltris».

Al faseve des lezions un pôc teorichis, un pôc su la storie dal moviment, de dibisugne de classe operarie che e je simpri stade sfrutade dal capitalisim di dâsi une culture e une organizazion”.

Intal 1922 al partecipe al camping Saf a Nevee. Intant al à scomençât ancje la ativitât politiche militante, al jentre inte Cooperative Socialiste di Felet, al aderìs ae ale tiercinternazionaliste dal Psi. Al partecipe ae Cunvigne provinciâl di Cividât dai 16 di Lui dulà che al si opon cun fuarce ae idee di un acuardi cu lis fuarcis di ispirazion democratiche e liberâl.

Il 1923 al è un “an plen di sostance pe preparazion definitive di cetancj alpiniscj furlans, adiriture ecelent par Feruglio, aromai scjaladôr di classe. Un elenc aprossimatîf des sôs scjaladis plui impuartantis lus conferme: intal mês di Lui cun Luigi Cecchini, Luigi Bonanni, Livia Cesare, Iolanda de Basadonna, al fâs une des primis ripetizions talianis de “diretissime” de Grauzaria (vierte intal 1900 di Napoleone Cozzi), tornant a fâle ancje lant jù; al scuvierç une gnove strade interessante sul Serni pe parêt a soreli a mont. In Avost cun Cesare Scarpini e lis dôs compagnis fedêls di cuardade si propon di tornâ a fâ la vie “dai cjaçadôrs talians” al Jôf di Montâs, rivant fûr inte cime daspò vê fate une variante lungje e dificile.

Pôcs dîs daspò, cun Enrico Bonanni, al rive a superâ la dure parêt a Nord Est dal Bila Pec, tacantle a man çampe de Grote di Brazzà. Intal Setembar infin, ancjemò cun Cecchini e lis dôs compagnis braurosis, intal Grop dai Monfalcons al puarte a compiment lis bielis scjaladis dal Cjampanili Toro e dal Cjampanili di Montanaie, puartant cussì a compiment la maraveose campagne estive”.

Cecchini al descrîf cheste venture su In Alto dal stes an. Di chê setemane dai 3 ai 8 di Setembar dal 1923, al reste un elegant racueidôr di fotografiis, cuntune dediche in biele caligrafie al cjâf di cuardade e lis firmis dai compagns.

Cinc dîs daspò, Feruglio al ven interogât in Prefeture a Udin e al conferme la sô fede comuniste, di volê continuâ a fâ propagande e di jessi talian parcè che nassût in Italie, e no par sintiments.

Al fo arestât.

Cun probabilitât il stes an al bandone il Psi e al jentre intal Pci fasint une propagande fuartonone. Al convinç i socis de Cooperative “rosse” di Felet direte di lui a disfâsi pluitost che jentrâ intal Sindacât Talian des Cooperativis di ispirazion fassiste. Il caratar impulsîf lu tradìs e cussì ai 26 di Jugn dal 1924 al ven condanât dal Tribunâl di Vignesie a 5 dîs di reclusion e 100 francs di multe par esercizi arbitrari des sôs resons.

Ai 22 di Setembar al va su cun Riccardo Spinotti, Livia Cesare e Edoardo Tolazzi su la Crete de Cjanivate pe parêt Sud de Torate e la crete a soreli jevât, crodint di tornâ a fâ la vie di Samassa e Urbanis dal 1895 e vierzint invezit une gnove dal dut.

In Lui al va sù su la plui part des Cimis di Pradibosc cun Livia Cesare, Scarpini, Regolo Corbellini e Lippi. La clamin Crete Livia in onôr de compagne di cuardade.

Al ven elet conseîr de Saf.

Si rive cussì al 1925.

Biel che a scomencin a vignî fûr gnûfs scjaladôrs, tant Oscar Soravito e Marco Tessari, ducj i doi plui indenant academics dal Cai, e la Uoei e cree une Sezion schiadôrs otignint il preseament dal president de Saf, la ativitât alpinistiche di Antonio e patìs par vie di chê politiche.

Insiemi cul fradi Beniamino al ven “arestât ai 3 di Otubar biel che al ten une cunvigne di elements soversîfs vie pe gnot dongje dal Cormôr di Felet”.

Intal 1926 pes sôs ideis soversivis Antonio al ven licenziât de Bancje udinese là che al lavore.

Intant il fassisim al è daur a cambiâ la Italie: al prin di Mai e ven creade la Opare Nazionâl Dopolavôr che daspò de vuere e vignarà clamade Enal. Lis associazions, daur de ativitât davuelte, a àn di decidi, se no àn voie di sierâ, di jentrâ alì o, magari tal Coni, jentrant tal Cai. Ai 10 di Avrîl dal 1926 a Gjenue il President dal Cai Eliseo Porro al comuniche ae Assemblee dai delegâts di vê decidût pe adesion.

Intai agns che a vegnin daspò, il Cai al cjaparà dentri di se dutis chês associazions che si interessavin des monts (e che no jerin stadis sieradis). La Saf e restarà indipendente fintremai al 1930, po dopo e decidarà di jentrâ tal Cai. Tal Avost dal 1926 Antonio al partecipe al camping Saf di Pocol (Cortine) dulà che insiemi cui coleghis Spinotti, Bonanni, Cecchini al trasferìs lis sôs cognossincis alpinistichis ai partecipants, e fra chescj a risaltin doi zovins interessants: Celso Gilberti (16 agns) e Giovanni Granzotto (pôc plui vecjo) ducj i doi academics plui indenant.

Ai 28 di Otubar si davuelç sot dai barcons di cjase sô une dimostrazion di plui o mancul 20 fassiscj, e lui al vose “O soi un talian ros e no cambiarai lis mês ideis” e che al sarès migrât in France se i vessin dât il passepuart.

Ai 27 di Avrîl dal 1927 la Prefeture di Udin e mande une note de Direzion Gjenerâl de Publiche Sigurece là che e sugjerìs il confin par “l’opositôr iridusibil dal Regjim”.

Ai 3 di Lui al vierç cun Giovanni Cantoni une vie sul Montâs rivant ae Grande Cengle di Nord Ovest cun dificoltât probabile di IV-V grât. Une des ultimis salidis e ven fate cun Livia Cesare su la Torate Winkler tal Grop dal Vaiolet.

Intant il ministeri dal interni al decît di tignî cont dai sugjeriments de Cuesture e lu confine par doi agns a Lipari a scomençâ dai 3 di Setembar. Di chest periodi o vin un sfuei di notiziis compilât de Prefeture di Messine che al ateste la sô condote regolâr.

Intal 1929, pôc prime che e finissi la pene, i ven proponût di partecipâ ae innomenade fughe de isule. Al refude, parcè che al volarès dî vivi in esili. Ai 27 di Lui Carlo Rosselli, Francesco Fausto Nitti e Emilio Lussu a puartin a bon compiment il tentatîf. Plui o mancul un mês dopo i rive il sfuei di vie e al torne a Udin.

Al ven metût dentri di un elenc di personis di arestâ in ciertis circostancis.

Il sfuei al ricuarde ancjemò lis fughis dal curtîl di daûr de cjase di Vie Dimpeç a Udin par scjampâ ae cature.

I sfueis di notiziis a continuin a jessi inviâts de Prefeture ogni trê mês fintremai al 1943.

Di chescj o savìn che al à lavorât intune cartolarie, ae librarie Carducci, ae speziarie Cogolo & Battistutto, che al manten lis sôs ideis ma al vîf dispartât, si dediche ae famee (al è sposât e al à doi fîs), e nol fâs cunvigne cun personis suspietis.

In realtât, cuant che Aldo Cuttini, par tornâ a meti dongje i cuadris dal partît, al torne a cjapâ i contats cui partecipants aes escursions sui Musi, ancje Antonio al aderìs ae propueste.

Intant une serie di modifichis a àn plasmât il statût nazionâl dal Cai daur dal volê dal Partît nazionâl fassist: il president gjenerâl al ven nomenât dal segretari dal Pnf e ducj chei che a àn carghis sociâls (presidents, rezidôrs des sotsezions, conseîrs, revisôrs) a scuegnin jessi iscrits al partît, lis ativitâts “a saran indreçadis al potenziament militâr de nazion”, al ven metût in dipendence direte dal Pnf, cence la supervision dal Coni e lant daûr aes leçs raziâls “i socis dal Coni a scuegnin partignî ae raze ariane”.

Cu la colade dal fassisim dut al cambie.

Ai 30 di Mai dal 1945 la Societât Alpine Furlane e nomine Antonio Feruglio comissari. Al sarà vicesindic di Udin e assessôr aes financis.

In ocasion de roture dal Pcus cun Tito si dimet dal Pci e in mût coerent di dutis lis carghis.

Pal rest de vite si dedicarà ae Librarie Carducci, là che al è deventât titulâr, fin pôc prime de sô muart, ai 3 di Jugn dal 1984.

La scrivanie dal so ufici in librarie, daspò che e je stade sierade tai agns Doi mil, e je deventade, graciis ae donazion dai siei erêts, la taule de presidence de Sale dal consei de Societât Alpine Furlane.