O ai sessantecinc agns e o soi di dute la vite une cjaminadore passionade che no si strache. Mi plâs l’aspiet mentâl dal cjaminâ. Ma che in montagne cheste mê passion no mi varès judade plui di tant al è stât clâr di subit, fin dal gno prin contat cu la Societât Alpine Furlane, al sportel de sede di Udin. Cjaminâ in citât o dut câs suntun teren plan e regolâr e cjaminâ in montagne no son propit dôs ativitâts che si puedin ecuiparâ. O vevi cetant di imparâ, plui di ce che o crodevi. La buine notizie e jere che se mi fos preparade su cualchi percors che al ves vût almancul un pôc di disnivel o varès podût iscrivimi a un grop di escursioniscj, i Seniores, adat ae mê etât. La seconde buine notizie e rivuardave la pussibilitât di frecuentâ, inte Vierte dal an dopo, un cors di base par principiants.

Cussì inte Sierade di doi agns indaûr, seneose di spaziis vierts, di nature incontaminade e di libertât, daspò cuasi doi agns di pandemie e setemanis cence fin di lockdown, mi soi iscrite ae Societât Alpine Furlane.

Il gno “batisim di fûc” – la espression no je mê ma di O., la persone che in chê ocasion mi à fat insiemi di santule e di agnul custode, grande passionade di storie de Prime Vuere Mondiâl – si è davuelt su di une mont cuntun non impronunziabil, la mont Mrzli Vrh, inte Valade dal Lusinç in Slovenie, ai 18 di Novembar dal 2021. E jere la mê seconde jessude cui Seniores. La prime, Cava Buscada ai prins di Otubar, no mi vene metude nissune dificoltât e e jere stade une vore plasevule: biei faêts, panorame maraveôs ancje se la zornade e jere grise e sbivicjose, polse par gustâ intun ripâr comut, piçule fieste pe nassite di un nevodut e, ae fin, l’incuintri cun E., che no viodevi di une vite e che o jeri stade contente di tornâ a cjatâ.

Su la mont Mrzli, invezit, pe prime volte o ai provât la fadie, il pês dal russac, il sudôr che ti flusche la viste, il teren sbrissot pal pantan e pes fueis, la insidie des lidrîs bagnadis, la dificoltât de salide e ancjemò piês chê dal vignî ju. E pûr no je stade une brute esperience, anzit.

Tant che par ogni prove impegnative che ae fin si conclût ben, il ricuart al è biel.

Soredut o viôt O. che e cjamine denant di me cu la sigurece di cui che chel paisaç lu à dentri di se (“la mont Mrzli e je stade il gno prin amôr”, e veve dite in machine) e ogni tant si ferme par fâmi tirâ flât.

Tal imprin la part plui gnove dai miei imprescj di montagne e veve dîs agns. A jerin doi bastonuts, rivâts tant che regâl di Nadâl par fâ Nordic Walking. Chê plui vecje e veve ben trentecuatri agns: si tratave di un pâr di scarpons di marche Lowa, comprâts tal 1987 intun biel negozi di articui sportîfs a Munic in Baviere par une vacance a Garmisch. Pardabon un toc di museu, ma il gno cjaliâr di fiducie mi veve sigurade che a jerin ancjemò perfets e no mi varessin tradide. Par scomençâ a podevin lâ ben. I scarpons vecjos a àn tignût dûr, ma di li a pôc a son stâts metûts in bande in favôr di un par gnûf che mi garantive une impermeabilitât perfete; po dopo o ai cambiât il russac, i bastonuts e vie indenant. O ai ancje zontât cetantis robis che no vevi, come la torce di meti sul cjâf e la camel bag, che aromai no podarès plui fâ di mancul di jê, e tancj piçui ogjets che mi sigurin plui comoditât dulinvie la escursion, tant che i sacuts par scjaldâ lis mans.

Cualchi an indaûr il grant artist britanic David Hockney al à fat fevelâ di se cul realizâ une serie di oparis di art digjitâls pardabon significantis cul so iPad e une semplice aplicazion che e coste dome 8 sterlinis. Cui che al à talent al rive a esprimisi ancje cun mieçs rudimentâi e o crôt di no falâ tal pensâ che ancje in montagne al sedi cussì. Ma par chei che, come me, a son di prin pêl, e no son dotâts di talents particolârs e no son zovins, dai bastonuts che si montin e smontin intun moment, cun impugnadure dople e une otime prese, o un russac lizêr e funzionâl, cuntune buine organizazion dal spazi che ti permet di cjatâ subit ce che ti covente, a fasin dal sigûr la diference.

Mi plâs ocupâmi dai miei imprescj di montagne, controlâ che a sedin a puest, tignîju nets, onzi alc se al covente. O dedichi a cheste ativitât la stesse cure che o met tal curâ lis mês penis stilografichis, i trapanis e lis fresis che o dopri par incidi il veri o i miei imprescj di cusine. O soi leade a ducj chescj ogjets, ju sint tant che un slungjament dal gno cuarp.

Un an indaûr, cuant che o ai scomençât a frecuentâ il cors di alpinisim, o jeri buine di interpretâ une cjarte topografiche dome in maniere aprossimative. O crodevi che se si ven muardûts di une lipare si à di supâ il sanc velenât de feride tant che un vampîr e spudâlu a colp. O cognossevi la peraule azimut parcè che e je une des tantis peraulis sientifichis e comerciâls prestadis dal arap al talian, ma cence vê une idee clare di ce che al è di precîs e, soredut, cence savêlu rilevâ.

Il cors mi à dât une serie di nozions di base su la mont e une cussience che mi mancjave. Fondamentâls, in plui des lezions di teorie, a son stadis lis jessudis intun ambient naturâl che mi àn judât a capî e a corezi cualchi erôr di puartament che al mi rindeve sedi il lâ sù che il tornâ jù dificii e sfadiôs plui di chel che a varessin vût di sei.

A pene che o ai scomençât a movimi cun plui sveltece e sigurece e la tension des primis voltis si è sfantade mi soi divertide une vore, ancje parcè che o ai vût la fortune di capitâ intun grop di personis cetant simpatichis, di dutis lis etâts, animadis dal prin moment di un biel spirt di scuadre. O crôt che no podarai mai dismenteâ la prime jessude, in Venit, intes Dolomiti Ampezzane, cuant che o vin completât l’anel di Croda da Lago. O ai iniment dut il percors, cuntune emozion che mi reste ancjemò, pe varietât e pe maestositât dal panorame, ma o torni a viodi soredut chê trate, viers Forcele Rosse dal Formìn, dulà che il paisaç al devente cretôs, lunâr, e in cualchi pont si scuen rimpinâsi doprant lis mans. Mi visi dal contat cul cret: gjonde pure.

Des voltis no si è avonde atents a ce che si à dongje. No imagjinavi che a pôcs chilometris, dopo dut, di Udin, citât dulà che o vîf aromai di plui o mancul trente agns, o varès scuviert paisaçs di montagne cussì sugjestîfs e cussì interessants daûr di ogni aspiet, no dome chel naturalistic. Al baste pensâ, par esempli, aes tantis glesiis, gleseutis, capelutis di montagne, che plui di cualchi volte a contegnin la sorprese di statuis di len, pituris su tele o pituris a fresc di buine fate. Tantis robis lis ai imparadis dai esperts che dispès si zontin al grop o che a fasin part di chest, ma plui di cualchi volte al è stât cualchi compagn di escursion che mi à fat notâ, di volte in volte, une olme di nemâl su la nêf, un flôr râr, il viers di un uciel, un inset pericolôs, la ruvine di une fortificazion de Grande Vuere, lis consecuencis dramatichis, che si puedin viodi ancjemò, de tampieste Vaia.

Intune interviste resinte al setemanâl Vanity Fair, Samantha Cristoforetti, cuant che i an domandât ce che e à imparât dal spazi daspò tancj agns di missions, e à rispuindût: la cussience che “nol è impuartant dulà che tu vâs, ma cun cui che tu vâs”.

Cu lis justis proporzions, o crôt che cheste frase e sedi buine simpri e dapardut. O soi stade cetant judade, cun gjenerositât e lizerece. In prin lûc dai coordenadôrs des jessudis, ma ancje dai altris escursioniscj plui esperts di me. Vê la sigurece di no jessi di bessole al è stât fondamentâl. O torni a viodimi su la cime di une cleve jerbose une vore ripide e sbrissose, cjapade dal panic. O ai pôre di colâ. O resti ferme fintremai che cualchidun al rive e al mi cjale tai voi par fâmi tornâ ae realtât e mi dîs: “Fiditi dai tiei scarpons”.

Cun chê frase no si pretindeve un gno at di fede, ma un resonament: la valutazion razionâl de realtât, dai struments che o vevi e des mês capacitâts. Al à funzionât. Di chê volte “fiditi dai tiei scarpons” al è deventât il gno mantra cuant che o soi in montagne, ma a pensâi ben nol è di escludi che al puedi vê cualchi utilitât ancje in altris contescj, no par fuarce dome in montagne.