Intal Setembar dal 1975 o vevi 22 agns, un fradi di 17, une moto Aermacchi Harley Davidson 350 e tante voie di lâ in montagne. Metint insiemi chescj ingredients, une sabide o sin partîts par cirî cualchi rimpinade classiche su lis Dolomitis dal Cjanâl Pedarç che e podès jessi al nestri nivel alpinistic. La salide sot sere al ripâr Fradis De Gasperi za e prometeve umiditât e fumate; intal ripâr o jerin dome nô e Pierino Gonano, il gjestôr; mignestron di verduris e formadi cun polente su la taule de cusine cul spolert piât. Po i discors solits dal dopo gustât. Une batude a câs di Pierino mi reste però ben fisse te memorie. “Jo chest an o lassi, o moli il ripâr. Masse sacrificis par masse pôc, pluitost o voi tal forest”.

Il dì dopo, brumacje e nui biei grues di siroc si scliçavin cuintri lis parêts di calcâr, o decidìn par une vie classiche e veloce: il cjamin Gilberti al Creton di Culzei, o tornìn de cime sot de ploie che nus compagne fintremai a Udin, dulà che un “pilote” cu la sô Fiat 500 al sbande sul bagnât, nus tampone, mi disfe la moto e al fracasse un pâr di cuestis a gno fradi. Ce zornade! Ma la notizie impuartante e je che pe stagjon 1976 il De Gasperi al cîr un gjestôr.

Viodudis lis premessis, o varès vût di lassâ stâ. Invezit, in chel Invier, o ai fat di dut par vê in gjestion chel ripâr. In Avrîl, daspò vê sierât i acuardis cul Cai di Tumieç, o vevi za comprât dut ce che al coventave pe cusine e pe sale e la blancjarie necessarie.

Mi jeri procurât une Renault R4 di seconde man colôr celest Madone, o vevi cjapât acuardis cuntun cogo semi professionist e ai 5 di Mai, mal visi cun precision, o jeri lât a cuistâ 108 butiliis par imbutiliâ il vin che o varès servît in taule.

Us prei di lei ben la date: 5 di Mai dal 1976. La dì prime de catastrofe dal taramot dal Friûl.

O vevi però de mê bande un bon antidot cuintri lis disgraciis, chês veris: zoventût, incussience e determinazion. Par chest, fuart dai miei 23 agns, cu la morose che ogni fin setemane e vignive sù di Udin cui furniments vuidant la nestre R4 cul so sfuei rose, e cul cogo a ûs cuasi privât, o ai viert di Jugn fin a Setembar.

O ai rispietât i impegns, ancje se a nivel economic al è stât un disastri totâl: ma o viodevi un avignî, piês di cussì nol sarès podût lâ, la buine fortune e sarès dal sigûr rivade intal 1977.

Vie pal Invier o vin decidût: si maridìn in ripâr ai 21 di Jugn, cussì dal moment che ducj i doi o restarìn par simpri in ripâr, la mê femine Chica e podarà cusinâ.

I amîs a vignaran sù la dì prime dal matrimoni, e sarà une fieste di montagne grandonone, a son ducj invidâts.

Al funzione il principi de selezion naturâl: cui che nol rive nol partecipe ae fieste, pecjât par lui. O vevin plui o mancul 120 amîs che a saressin vignûts sù e mîl robis di fâ, ancje procurâsi il vin, chel bon, e chest lu viodeve gno missêr.

Doi dîs prime de cerimonie, lis damigjanis a jerin cjamadis su la teleferiche che jo, come simpri, e recuperavi di adalt; une operazion za fate un centenâr di voltis. Propite chê volte, però, une serie rare e straordenarie di sfortunis e je vignude jù in mût imprevedibil e cussì, tal recuperâ il caric preziôs, o ai metût la man diestre inte cidule de cuarde, ridusint la mê cjare man tant che une bisteche plene di sanc ben pestade dal becjâr. Risultât: jù a pîts inte solite fumate, ospedâl di Tumieç, 6 tendins sbregâts, 9 fraturis, 6 operazions, la prime durade 8 oris e di consecuence la man cuside e blocade su la panze par 32 dîs.

Un biel casin. Nô però si maridarìn istès! Però prime o ai di vuarî.

Cussì, daspò gnots cence durmî passadis a cirî di strenzi il pugn, ai 9 di Setembar o soi lât su cu la mê man e cun gno fradi pal solit cjamin Gilberti (4° grât) lant indenant in alternade.

O podevi maridâmi e cussì al è stât, la fieste e je stade speciâl, i amîs contents, il timp e lis monts maraveosis e ancje se la date dai 11 di Setembar par chei altris e ricuarde une tragjedie mondiâl, par nô e reste une dì di grande zoie.

Cheste volte, però, o ai dite vonde: in doi agns o ai pierdût un biel pôc di bêçs e cuasi i lassavi une man. Cu lis lagrimis intai voi e il cûr pesant o scugnivi lassâ il ripâr.

Ma di chei dîs lontans ducj i ripârs a son par me alc di speciâl di tignî di voli cun atenzion, di vivi cun afiet, di curâ parcè che a son unics, straordenariis e particolârs, tant che lis feminis e i oms che ju gjestissin e ju vivin.

Dî ripâr al è tant che dî cjase.

Ma bisugne jessi precîs: barache o cjistiel?

Al De Gasperi o vevin dome un motôr Acme 500 cun inviament a tiron (tiron sigûr, inviament casuâl) che, spostant a man la cengle di trasmission, al podeve fâ funzionâ, se al voleve, la teleferiche o il grop eletrogjen.

Clâr, nol jere il colegament ae rêt Enel e il telefon nol si rivave a doprâlu cul maltimp par vie des saetis che, cjatant a facil il cabli di açâl, e tornavin sù lunc la linie e si scjamavin sul ripâr. Nol jere un frigorifar e figurìnsi il conzeladôr, pe aghe cjalde o vevin di doprà il fornel, pe aghe di bevi la sorzint e la pompe a jerin 200 metris plui in bas. In cualsisei moment che e ves vût di coventâ, duncje, si veve di molâ cusine e sale, cjamâsi 20 chilos di carburant su la schene e lâ a impiâ il motôr restîf, o restâ cence aghe.

O vevin però plui di 80 liets cun brandinis che a ciulavin e dome doi bagns, ben posizionâts intai plans des scjalis, che a vevin di coventâ ancje pai aventôrs dal bar ristorant.

Ce timps, ce pazience, ce passion che a vevin di vê i aventôrs, ce zornadis complicadis par nô, cuant che la domenie e rivave la ploie e o scugnivin dâi al purcit il pignaton cul mignestron di fasûi e butâ vie intîrs ombui di brusadulis! Vierzi la puarte di un gnûf ripâr mi fâs vignî iniment dut chest e o pensi: “Cuissà cemût che a fasin?”. O cjali se a son i cablis dal Enel, o cjali la teleferiche, o cîr la cistierne e lis pompis de aghe e o studii i bagns e ducj chei particolârs che a fasin di chel ripâr un episodi unic plui o mancul facil di gjestî.

Cussì al è stât vie pai agns, dai ripârs dolçs di cjase nestre ai ripârs comuts e siôrs austriacs e sudtirolês, ai ripârs spartans slovens, ai monuments storics des Alps a soreli a mont, dulà che par lâ al bagn esterni di gnot tu vevis di meti su i rampons.

O ai doprât i ripârs di fortune dai pastôrs lant su di Invier su la mont Ararat, o ai doprât i ripârs in piere, ereditât de ocupazion francês, intal Toupcal marochin, dulà che no tu cjatis ce mangjâ ma tu puedis comprâ i lens di brusâ intal cjamin. Fintremai inte isule di Crete o ai durmît intun ripâr, pe precision intun ricovar invernâl, dulinvie une traviersade schialpinistiche intune gnot di vint impetuôs.

Dal Ripâr Regjine Margarite su la Mont Rose ae Capane Vallot su la Mont Blancje fintremai ai ripârs a font valade che a rindin speciâl la bire ae fin de gjite, jentrâ al impie dentri di me une emozion uniche e une curiositât che mi fasin sta ben.

Tornìn al 1977. Daspò dal gno definitîf e malinconic cumiât de gjestion dal De Gasperi, o ai decidût di fâ frutâ il gno diplome di gjeometre, vierzi un studi, dissegnâ, progjetâ, direzi cantîrs, fâ sù. Il ripâr però al à simpri vût un puest impuartant framieç dai miei ricuarts, al tornave fûr tant che une nostalgjie che e spietave rispuestis. La ocasion par tornâ a fâ alc par ripârs e je rivade plui o mancul dîs agns indaûr. Dulinvie une gjite di schialpinisim, l’amì Sebastiano Parmegiani, president de Societât Alpine Furlane, mi à domandât un parê su lis voris di ristruturazion dal ripâr Gilberti; al voleve confrontâsi cun me su cualchi aspiet tecnic prime di dâ la autorizazion al progjet in consei. Il progjet al jere stât fat de Promotur e i lavôrs a saressin stâts fats di une dite a paiament di ce che al jere stât patuît pe cession dal teren là che po e je stade fate su la stazion de gnove teleferiche dal Prevala. E jere une operazion une vore impegnative dal pont di viste economic pe Saf, che e veve tratât cu la cuintripart de Promotur ducj i aspiets finanziariis de transazion, delegant al ufici tecnic de dite la part dal progjet e de esecuzion.

Il risultât al jere a dî pôc sorprendent. Il progjet al previodeve, par esempli, la sostituzion de cjalderie a gasoli, che e funzione ancjemò vuê, cun dôs cjalderiis di 35 chilowatts, che a varessin vût di alimentâ un implant a circolazion di licuit che al lave distribuît ai radiatôrs in ogni une des cjamaris. Chest dome par fâ un esempli, insume il ripâr al vignive slambrât e modificât dal dut, daur dai criteris di svicinament ae montagne tipics di Promotur.

Puartâ modifichis a di un progjet za definît nol è propit facil, ma o sin stâts fortunâts e o vin cjatât inte cuintripart un tecnic disponibil e resonevul, cun lui o vin podût dì par dì colaborâ, modificâ, zontâ, compensâ la spese inte miôr tradizion dal “cumbinin”, par puartâ cjase un risultât che jo o riten di sodisfazion.

Cui che, par resons anagrafichis, si vise cemût che al jere cumbinât il vecjo ripâr Gilberti e lu confronte cu la situazion di cumò nol pues no viodi che al è cambiât dut cence stravuelzi nuie.

Miracui no si puedin fâ soredut se i vincui dal paisaç a son cetant strents e i bêçs avonde pôcs, ma vuê il ripâr al è comut, cjalt, sut, luminôs e ospitâl. Dal sigûr cualchidun al disarà che si podeve fâ miôr, ma chest al vâl par dutis lis robis dal mont.

A chest pont, jessi nomenât responsabil dai cuatri ripârs de Saf al è stât logjic e consecuent e cussì e je scomençade une aventure personâl e professionâl durade dîs agns che mi à insiorât, divertît, fat lavorâ e cognossi gnovis realtâts e personis.

A chest pont jo o varès finît. La amie Alessandra mi à domandât un articul pe storiche riviste de Saf “In Alto” e jo o ai proponût il teme dai ripârs. O pensavi di scrivi un articul curt, il minim sindacâl par inzornâ i sociis de Saf, ma mi soi fat cjapâ la man e il cûr dai ricuarts e des emozions personâls. O varès voie di sierâ cuntune citazion, un pinsîr che nol è gno, une poesie maraveose di Leonardo Zanier, Ogni sere. Lui al jere a stâ a Comelians e de sô cjase al viodeve l’amont in val Pesarine (il Cjanâl). Là sù in fonts ae val, sot des crodis, al è il ripâr De Gasperi e li al jere un fantat gjestôr che de puarte dal ripâr al viodeve il stes amont e al viodeve la val di sot deventâ simpri plui scure.

O dedichi cheste poesie a Zeno e a Valentina, zovins gjestôrs, a Irene e Fabio, a Caterina, a ducj i gjestôrs che cun indurance a tegnin vierts i lôr ripârs e mi plâs imagjinâju intant che al amont, daspò une zornade di lavôr, su la puarte dal ripâr si gjoldin l’ultin rai di soreli che al lusìs su lis lôr cretis.

Il dì ch’al clopa

al trascina i siei ros

su pas monz di Cjanâl

e sot

la not

a glot las vals

e impia la poura dai oms